محمد الحسن سالم حميد--الضو وجهجهة التساب5

والموية بدًلت الوجوه...يا بادي من بيتك تتوه,تضهب ضهب لو بابو مافى أو العتب تحسبلو من قوز الرماد,أو بيت أمير المؤمنين اللِسة حِيُطو تسوي رب رب ...دردرب... والدندهوب إندك دك:هرس القزاز الموية جاز والجاز ودك,بينو الدقيق إتلك لك,المكحلة الكتشينة ميزان الدهب,ضِلف الدواليب الكُبار عايمات خشب... ضُوق الغضب,ضوق المذلة الدُستبا الناس العُزاز....سيدك دخرنالو المطر,اما انت يكفيك الرزاز,خدرت تاني يجي الجراد,أقوى الحقيقة من المجاز....وهنا المحك... يا أرزقي...يا نسل حمًالة الحطب...يا مستفيد من بِزة أطفال السواد الما نزل فوقهم مَلك...بالسكر العيش السماد الموية اولي من العباد..في يات كتاب دين يات حديث يا فاجر الله بيسألك...يا حسرة الاِتغشًى فيك,كبًر وراك جاهد جهاد لامن هلك.. يا حسرة الصدًق صلاتك وموعظاتك في الفساد بان الشرَك..شكرا جزيلا يا بحر رغم الكساد,بحًت لنا العفن المكرِن في الزمن من عهد عاد,والضو وليدا ما قرا خرًجتو منك بإقتصاد, قانون,فلك,جفً المداد ما أعدلك!!بالسكر العيش السماد الموية أولي من العباد؟يا شارع الثورة القُصاد أهلى المسالمين البُعاد يا بندقيتو...هنا المحك...هنا المحك