محمد الحسن سالم حميد--الضو وجهجهة التساب13

صنًت شويتين نهنهت,خايفاك يهقلك السراب ,يالضو يهقلنا السراب,والضو صنم ما جاب جواب...لى ذاتو مستنى الجواب....أمونة وينا؟ مع العوين فى المدرسة....أُمِك منًصحى حالا زين؟فى المدرسة....خالتى الزلال؟في المدرسة....جِدٍك حسين؟فى المدرسة....السُكنة كيف فى المدرسة؟ العِيشى كيف؟ تسعل سُعال يالضو تقول تام لك سنةِ...تسعل تقول ماك من هِنى...شِن السعالات ينفعو...ما حال غلابة على غلابة إتفرزعو,فتحولن الغُبٌش القلوب قبل البيوت,قسمو القليلي مع بعض,كم طمنونا وشدعوا....لكن دوام الحال مُحال,وعلي العموم ما مرً يوم ما جاب هموم,هملى ونِقاراً تسمعو,واحدين يقولولك خلاص,واحدين مُصرٍين يرجعو,إنجيت بلدنا مطمنة؟بس كيف ياخى نأمِنا قبل البحر من ها الفِقَر,فِقَراً ضُعُفنا مسمِنا,الفى العروق دة مو دمهم,دمك ياخى ودمى انا,النار تكيد في الكان سبب يالضو بيوتنا يوِقِعُو,ونهجر بلدنا نزح هنا,الله يجازى الكان سبب يالضو بيوتنا يوقعو,نهجر بلدنا نزح هنا,كان سُلطة تنسلًط عليها وكان لِجانًا تلجِنا