محمد الحسن سالم حميد--الضو وجهجهة التساب7

ما أعتى حربك يا بشر,إنت الغريب والموج يشيل غادى ويجيب,وإنكربش النيم الدبيب,والضو مو جايبلك خبر...طق دندهوب ناس ست نور عودو إنكسر وفات بالبحر..تِحت السماوات مافى أرضك::فى الموية, فى الريح ,فى المطر,فى الدابى,فى التمر الختر....وإنسان يطق قبل السنة عرًاقي والوشي والشَعر..غيًر وقفتو الدندهوب زالف هبر..يا غيمة هوي :ده وكت مطر؟...وإرتج جوف الجو رعد,يا الضو كفر يالضو كفَر..من بعدما نفد الصبر والإحتمال فى الجوف دشر,صنَ المطر والجو صِفا...بنقر حجر بت الرسول لكن بعد ما الضو كفر...ضربت شعاعات الشمس فى دوشة فوق قوز الرماد:كلبة مدينة ,نِعيجتا,ديك العجوز وكديس عماد وطيرة بقر ودِحيش غريب...شُوف الظروف:دحشك,حُمارتك والضيوف,قلعن يحفتن فى الرماد,بالسكر العيش السماد الموية أولي من العِباد؟ وبالفيتريتى العيش حُكم الموية أولي من البُكم؟ وملَص العريريقى ولباسو ومصرٍن ما غيرٍن,خمخم عقاب الكسرة والآبري القديم,من دندهوبو المنتكِل فى النيمة شال باقى الاكل,خم الدبيب في القُفة مو جايب خبر,خم الرياح,خم المطر,خم الجِراح,,لفالو فرعين منقة بالمنجل هبر,حشحش صبايتا هِن صُفر لكن غُلاد,البدرى لسة على الحصاد,,,في الراح علي قوز الرماد,يالضو بقالن أعز زاد,ونجاضو زاد, وإنكابسن فوق التمر,كلبة مدينى ,كديس عماد...يالضو دبيب,طيرة البقر فى الجو تغيب,دلًت من الكازوم دبيب,والضو يصنقع والورل ,يارازق الحيوان اخو,نختا وتصيب....نتحدي كيدك يا بحر,نتحدي إيدك يا مطر...يا آفة يا ريح يا فِقًر...نِنتحدى بالصبر الجميل ..بأعمالنا بي طيرة البقر