محمد الحسن سالم حميد--رسائل حميد من ست الدار بت احمد جابر1

جواب اول: بسم الحاضر والمستقبل,ست الدار بت احمد قالت:ليك يالزين ودحامد شوقنا.أما بعد:المبعوث المِنًك وصلت,ورُح فكًيت الطلب الفوقنا,باقى الدين يالزين خلًصتو,قدر الفاضِل:مصروف راشد والتومات,والجايات من جاى لا جاي,وزى ماقلت لك قُبال ده,شهرإتنين حنطهر راشد,شهر إتنين المدرسة تأجز,والله يبعد العارض تجينا,وراشد حالف ما يطهًر الا ابوه وعمًتو تحضر,والا يجيبو الفنانين,عشان الشوق بت سِرًنا ترقص والشبًال والدارة تعِج,قلنا نجيب المدًاحين,راشد طنطن وقال: انا جاى من الحِج,وراشد لما يطنطن كل الدنيا الفينى تطنطن,غايتو بشر بس ربى يهون ربى يهون,وما كلًمتك بالتومات:اول البارح جنًىِ يرطنن قالن:نحن الخواجات,بسم الله مرَق لقيتلك جعفر زارد البيت بالخواجات,يبقوا حِداشر وخواجية,ناس البلد إنكسروا عليهم,فِضلوا يقلٍبوا فى إيديهم,عدمانين من إسم حكيم ولا خبيراً للمشروع,علماء آثار؟؟؟فِضلت فيها آثار ,ما خمًوها الجونا قبلكم شِن خلولنا بلا حجار؟الله يصرف الخواجات,وبينات جعفر والمحجوب والخواجات طقًت حُجة العمدة طفاها,وباقى الناس الجات للفُرجة قنًبوا قيًلوا شِبعوا لحوم,والخواجة يصور ساكت,صوًر البت الجنفاوية طالعة تكسر فى الواقود,وشافع الحلبة اب خِلعاً برة إيديه تدمدم وجارلو عود,كُنا نصور فى البوبار,والخواجة اكلو عتود بوبار العمدة وبزخو,سِتة خرًفن وتيس إنصفًن,ستة خرفن وتيس ما كفًن,ستة خرفن فى فد يوم,المعدوم أشكال والوان,أي خدار فى اليوم داك فى,كِملن رف كمين دكان,ساطوا السُكًر شوالين,يا سوق أسود جات من وين,لولا اللِعب الفى التموين,وتالتة جِدًك عالم الله إلا الجاها من الجيران,وبعض الناس درشو الكرملة,دنيا هطيطى وصبر سِجرى ناس ماشين فى العصر الكم وناس عايشين فى العصر الحجرى