محمد الحسن سالم حميد--رسائل حميد من ست الدار بت احمد جابر3

غاية الليلة السقًا يشولق,واطات الله دى جت رشًاها,مافى غنيوة ما غناها,مافى مدِحةً ما سواها,حمارو صِبِح لحق أمات طه,دمًع بكى سبً الدين والامريكان جِنس بدع,زولك دة يحير,توب الفلهمة تلقى يجرجر,توب الدين شفًاف وقصير,تقع الحارة مراكبو تغرٍق,وقت الفارغة خزاينو تسرب,صدقة شهامة كرامة إحسان الله أحى والعبد حنين,إتذكرت كلامك لي:إنو فى ناس لاعبين بالدين وناس لاعبابا الامريكان ,الله يصرف الفرتيكان,ما خلًونى نشتت منك,كيفن حالك يالخرطوم؟؟كيف المصنع والعمال؟حالهم لِسًع نفس الحال؟جون ما بقى رئيس دورية؟زينب لسة مع التدريس؟وجِنٍى مصاغر غنم البوليس,ودالسرة مع اليومية لسة مُصٍر لا يمشى يهاجر لا يتعين بي ماهية,وما رقٌوك سووك باشكاتب؟يورينا الله زيادة الراتب,ولنصايبك لسة حاسب,لما تحاسب مهما تنسنس مهما يراغب,يقطع عيشك كضبا كاضب,كيف الناس والحالة عموم؟والعزابة الكحيانين,سيد البيت عل ما سكًاكم؟لسع تقعوا تقوموا براكم,قلبي معاكم,ربي يخضٍر يوت ضرعاتكم,وبالي هناك يالزين ودحامد,بالي هناك والشوق الشوق خلًى شديد الجوف محروق,راجى مطيرة الزين ودحامد