محمد الحسن سالم حميد--الضو وجهجهة التساب14

وبى توب وكت نزحت حِرق,قشًت وشيها من الاسى ومسحت وشى الضو العِرِق,عصرت على طرف الطريق,عقدت سفنجتها بى دِلق,وكل فردة كانت من بلد وينشافن الاتنين خُضر,الليل سُتر...الليل ستر...سرحت مع الخاطر بعيد...عكس العِرق..شيمة التهاويم شالتا.... إحنا وقدرنا قدُر قَدُر,نصبر صبُر,نصبر على البوخ الغريب,نستحمل اصوات القعو,لامن نلاقى الهمبريب,والليل غناوي نولعو...يا يُمة تفرحى من طرف لمًا المسافرين يرجعوا,ده كأنو لا دمع إنزرف لا خيوط قلوب إنقطعوا,لا شتلة لا محصول تلف,لا ناس بيوتن وقًعوا ,بحرا بلا الخازوق زحف,نبنيلو قيف ما يِطلعو,صُدفتنا تبقى آخر الصُدف ,نمسك زمنا نطوعو,يختونا يمشو يودعو,فِقَراً علينا إتربعوا,ديل لا بِيخافوا من الحساب لا بختشو لا بشبعوا,حقاً تحرسو ولا بيجى,حقك تَقاوى وتقلعو,أمسك شباطين الصراع,المابتحصلو فَلٍعو,ثبٍت لى بالك لا يلين,أنقح ترابك وازرعو,عقبان ابو الإنسان ما شقًا حنكا ضيًعو