محمد الحسن سالم حميد--الضو وجهجهة التساب16

والجاي أعتى من اللى فات,والضو تنى عضً أصبعو,عضابو حس الطائرات,عضابو صبرو وطول رجا,وي ابونا جا,وى يالتميرة ابونا جا وجَرُو كالفراشات شثفعو,جرو منو غادى وفلًعو,أدو البحر,ادو الحجار ساعة الحضانقول يجدعوا,برًاق عيونن يشلعوا,تانى القميرة يصنقعوا,ياطالع الشجرة جيب لي معاك خيمة تستر من المطرة كان كبت الغيمة,جيبلك معاك قمحات..قمحاتنا فى الشيمة وغنم الحلِب رايحات ضلًمنا ضلٍيما,يا طالع الشجرة جيبلك معاك خيمة خيمة السعودية دفو ما بتدفيكا,لبن اليهودية بلدك ينسيكا,قمحا من امريكا خازوق رِكب فيكا غير خير بواديكا مافى اليكفيكا,يا طالع الشجرة من خيمتك التوبة جيبلك فروع خضراء أو جافة يادوبا,فى الحرة في المطرة فى عز برد طوبة نمرق من الوكرة وتبقالنا راكوبة,ياطالع الشجرة قبٍل على الحلة:قول ليه يوم بكرة كُربتنا تنحلا,ننزل نضويكى ضرعاتنا ما دلة,قادرين نسويكي وعقبان على الله,يا طالع الشجرة طولنا يا والله انزل هيا ويالله,إندلى..تندلى حلتنا..حلتنا مادلة....ما دام الاسف والجهجهات ما بينفعو,ثبِت يقينك يا ولد الناس مصيرن يرجعو,ما شال عزيمتنا الهوا والبندِق المربوط سوا,مافي أى ريح بتفرزعو,إنت وأنا نار السعف كان ولًعت بيناتنا ما تستهونا,الجو شرارة تولعو,الزول بحِن حِن ياولد,حِناً يقدمك اتبعو وتِش عينو دجًال الضلال قُبًال يمد لك اصبعو,حِن ياولد..حِن ياولد..حِن ياولد,والضو يقالد من طرف ناس البلد قبال يقالدو يدمعو,دمع السواد الإنزرف لو الدموع بيرجعو,فى عمة في بِت فى ولد,شمً البلد,ناضم قبيلتو ووانسا,هبهب دموعو ويبًسا,نقناق حبيبين القسا طراهو حس الطائرات والضو نِسى قوز الرماد والفيهو فوق قوز الاسي الفي المدرسة